Familia yangu ina baba, mama, mimi na ndugu zangu; wawili wa kike na wawili wa kiume. Kiongozi wa familia yangu ni baba. Yeye ni mwalimu katika shule jirani. Baba yangu ni mtu mzuri sana lakini ukimkasirisha, utapata adhabu. Huwa anafanya kazi kwa bidii ili kukimu mahitaji ya familia yetu. Yeye hutununulia chakula, hutulipia karo, na hutununulia nguo. Zaidi ya yote, anaipenda familia yake sana.
Mama yangu ni
msaidizi wa baba. Yeye ni nesi na anafanya kazi kwenye hospitali moja karibu na
kwetu. Yeye ni mpole na mwenye bidii. Wakati mwingi, huwa hayuko nyumbani.
Lakini anahakikisha anapata muda wa kukaa na familia yake. Yeye hutupa moyo
hasa kuhusu shughuli za kiakademia, na anachukizwa sana na uvivu na utovu wa
nidhamu. Mama yangu anaweza kumwadhibu yeyote kwa kutumia kifaa chochote anapokasirika.
Kabla ya kumwadhibu mtu, yeye humweleza
makosa na baadaye kumwadhibu.
Wikendi, wazazi wangu
huwa nyumbani. Sote tunasaidia kufanya kazi za nyumbani na shambani. Tunaweza
kupanda mbegu za mimea mbalimbali au kupalilia mimea.
Siku za Jumapili,
baada ya kula kiamshakinywa, sote
huelekea kanisani. Wazazi wetu hutufunza kwamba, ni vyema kutenga muda wa Mungu.
Tukienda kanisani, huwa wanatuhimiza kumtolea Mungu sadaka. Baada ya hapo, huwa
tunatembelea makao ya watoto yatima. Tunawapelekea nguo na vyakula. Watoto yatima
hukosa mapenzi ya wazazi, kwa hivyo, tukiwaonyesha upendo, wanapata moyo wa
kuishi kwa furaha kama watoto wengine wenye wazazi.
Wakati wa likizo,
huwa tunawatembelea babu na bibi nyumbani kwao. Sisi hunawapelekea vitu mbalimbali
na kukaa nao kwa siku kadhaa. Wanafurahi sana wakati wajukuu wao
wanawatembelea. Wao hutupatia mafunzo mengi kupitia hadithi na mazungumzo ya
kawaida.